Qeveria do të ndërmarrë një aksion të ri për të hetuar punën e tatim-Taksave, hipotekave, doganave dhe institucioneve të tjera të dhënies së shërbimeve.
Burime qeveritare bënë të ditur se skuadra që po punon për qeverinë e re, po harton një platformë vetingu për të gjithë punonjësit e shërbimeve ndaj publikut, duke filluar nga hipotekat, ku ky lloj vetingu i posaçëm do të aplikohet për herë të parë, shkruan Panorama.
Po ashtu të gjithë punonjësit e hipotekave, hetimit tatimor e të tjerë do të rekrutohen apo rikonfirmohen me një proces konkursi të posacëm.
Në cdo institucion shërbimesh do të ngrihet një zyrë e posaçme antikorrupsion, ndërsa po mendohet edhe për një komision shtetëror të etikës së shërbimit të administratës ndaj publikut.
Të enjten Rama shkarkoi të gjithë drejtorët e hipotekave. Qeveria ka shpallur si luftë pa kompromis spastrimin e administratës nga ata që Rama i ka quajtur si parazitët dhe grabitqarët që abuzojnë me zyrat e shtetit.
